خصوصيتك على ايفندار

لما تتصفح الموقع

مش محتاج حساب عشان تشوف الفعاليات. وبنعد الزيارات من غير ما نعرف انت مين.

مافيش أدوات تتبع إعلانية على الموقع.

بنستخدم الفعاليات اللي بتفتحها وبتحفظها وبتسجل فيها عشان نرتبلك الفعاليات على حسب اهتماماتك. لو مش داخل بحسابك، ده بيفضل في المتصفح بتاعك بس ومابيوصلناش. وتقدر تقفل الترتيب ده في أي وقت من الزرار اللي فوق القايمة.

لما تعمل حساب

بنحفظ إيميلك، واسمك، وصورتك لو حطيتها. ورقم الواتساب لو كتبته بيفضل خاص ومحدش بيشوفه.

بنحفظ الفعاليات اللي حفظتها، والمنظمين اللي بتتابعهم، وتسجيلاتك في الفعاليات اللي بتسجل فيها على ايفندار، عشان نوريهملك ونفكرك بيهم.

لما تسجل في فعالية على ايفندار

اللي بنجمعه: اللي بتكتبه في التسجيل، يعني اسمك وإيميلك أو رقم الواتساب، وإجاباتك على أسئلة التسجيل لو الفعالية فيها أسئلة، وصورتك لو ليك حساب. ولما توصل الفعالية بتذكرتك بنسجل حضورك.

ليه: عشان نحجزلك مكانك، ونبعتلك التذكرة والتذكير، ونسهّل دخولك على الباب.

مين بيستلمها: منظم الفعالية اللي سجلت فيها، عشان يجهز لها ويتواصل معاك بخصوصها. وعشان يعرف جمهوره، بيشوف كمان تسجيلاتك وحضورك في فعالياته هو بس، وعرفت الفعالية منين، وهل بتتابعه، ويقدر يحتفظ بوسوم وملاحظات لنفسه تساعده في التنظيم. المنظم هنا يعني صاحب الحساب والمديرين اللي هو بيديهم الصلاحية دي، ومنظم تاني مابيشوفش حاجة من ده.

وايفندار بيعالج البيانات دي عشان يشغّل الخدمة، ويحافظ على أمانها، ويساعدك لو احتجت حاجة. مابنبيعهاش، ومابنديهاش لحد لأغراض إعلانية.

التذكرة فيها كود خاص بيك، ومحدش يشوف بياناتها غيرك انت والمنظم.

لما تضيف فعالية أو تبعتلنا ملاحظة

بنحفظ بيانات الفعالية، وبيانات التواصل مع المنظم اللي بتكتبها، عشان نراجعها وننشرها.

الملاحظات اللي بتبعتها في صفحة نصايح لايفندار بتوصلنا احنا بس، ومش بتتنشر.

بياناتك فين

مفيش لحد النهارده مراكز بيانات مستخدمة في مصر، فبياناتك بتستضيفها شركات برّه مصر، كل واحدة لشغلها المحدد.

الكوكيز

بنستخدم الكوكيز اللي الموقع محتاجها بس، عشان تفضل مسجل دخولك والموقع يشتغل معاك صح. ومافيش كوكيز إعلانات.

حقوقك

تقدر تعدّل بيانات صفحتك، أو تمسح حسابك بنفسك من الإعدادات. المسح بيشيل بياناتك وصورتك ومحفوظاتك وتسجيلاتك، وأي وسوم أو ملاحظات مرتبطة بيك عند المنظمين، والكلام اللي كتبته للناس على ايفندار بيفضل من غير اسمك.